Beklager maset om midlertidig søknadsfrist i 2026, men vi syns det er så synd dersom gode prosjekt ikkje kjem inn tidsnok, altså før 25. mai:-)
I dette nyheitsbrevet går vi derfor litt nærare inn på kva næringsfondet i Lom kommune faktisk kan støtte. Lurer du på om dette er aktuelt for deg? Da bør du lese vidare.
NB: Landbruk / skogbruk treng ikkje å forhalde seg til denne fristen, der er det løpande søknadsfrist som vanleg.
Nye eller eksisterande bedrifter i Lom kan søkje støtte til utvikling, marknadsarbeid, undersøkingar, produktutvikling og investeringar. Tilskotet kan dekke inntil 50 % av godkjende kostnader for utviklingstiltak, og inntil 30 % for investeringar (maks 150 000 kr per tiltak). Innovasjon, berekraft, verdiskaping og sysselsetting vil bli vurdert. Tilskot til kompetanseheving kan også vere aktuelt.
Arrangement
Kommunen kan gi støtte til arrangement som skjer i Lom eller gir tydelege ringverknader lokalt. Det blir lagt vekt på nyskaping, lokalt eigarskap, verdiskaping og sysselsetting. Arrangement utanom høgsesong (vår, haust, vinter) blir særleg oppmuntra.
Det kan givast oppstartstilskot dei tre første åra for å redusere risiko. Tilskot utover det må vurderast i kvart tilfelle.
Miljøsertifisering
Bedrifter som vil ta eit grønt steg vidare kan få støtte til miljøsertifisering.
Tilskotet kan dekke inntil 50 % av kostnadene, maks 20 000 kr. Resertifisering blir ikkje støtta.
Prøveleige
For å stimulere til meir bruk av kontorfellesskap kan ein søkje om støtte til å “prøvesitte” gratis i inntil fire månader. Ordninga gir inntil 10 000 kr per søkjar, avgrensa til maks 2 500 kr per månad. Gjeld berre for nye brukarar av kontorfellesskap i Lom.
Skredfarevurdering
I byggjesaker der vidare utvikling krev fagleg vurdering av skredfare, kan tiltakshavar få støtte til geologisk vurdering. Tilskotet er maks 15 000 kr, og kan dekke inntil 25 % av dokumenterte kostnader. Støtte til vurderingar for nyetablering i registrerte fareområde kan ikkje påreknast.
Kommunen gir ikkje støtte til:
Ordinær drift
Kjøp av eigedom
Kjøp og leasing av motoriserte køyretøy, datamaskin, nettbrett, mobiltelefon o.l.
Rein utskifting av eksisterande maskinpark / utstyr
Etableringar der ei verksemd får ny eigar, men går vidare utan vesentlege endringar.
Var det aktuelt?
Da kan du følge vidare prosess:
Kontakt gjerne næringssjefen for ein kort prat / sparring (ashild.amundsen@lom.kommune.no / 975 22 977)
Opprett brukar (viss du ikkje har det allereie), og send inn søknaden din via www.regionalforvaltning.no før 25. mai
Hugs at det er mogleg å legge inn vedlegg, sidan skjemaet tillet veldig få ord for å beskrive tiltaket.
Som alltid tek vi ei felles vurdering på om det er andre støtteordningar som er meir aktuelle (og har meir penger..), som t.d. gjennom Innovasjon Norge.
Hugs at søknadar blir offentleggjort i postjournal. Du kan be om å få halde den utanom offentlegheita dersom søknaden innheld bedriftsensitiv informasjon.
Heilt til slutt vil vi nemne at budsjettet er på kr. 200 000 som skal dekke alle tilskot, slik at det blir harde prioriteringar. Alle søknadar vil få behandling i både formannskap og kommunestyret før sumaren.
Ta gjerne kontakt viss du har innspel på tema, ris / ros eller berre ynskjer ein prat,
Det er ikkje alltid vi får fulgt opp alle like raskt som vi ynskjer, men vi gjer så godt vi kan - det er alltid lov å purre på svar viss det tek for lang tid 💚 Følg oss gjerne på sosiale medier for meir jamnlege oppdateringar.
Næringssjef
Åshild Myhre Amundsen
ashild.amundsen@lom.kommune.no
Tlf. 975 22 977
Du finn meg i 3. etasje på Midtgard saman med plan, teknisk, eigedom etc. - og på kontor med Hege.
Foto: SMELT Media
Bygdeutviklar og bustadkonsulent
Hege Olimb Myhre
hege.olimb.myhre@lom.kommune.no
Tlf. 453 12 269
Du finn meg i 3. etasje på Midtgard saman med plan, teknisk, eigedom etc. - og på kontor med Åshild.
